Faculty of Education

A Whakapiki i te Reo e whakapiki nei i te reo

Te Kura Māori o Porirua

Ko ngā mea o tēnei kura e whai ana i te kaupapa, kei te whakaoti i te tau 2 o Whakapiki i te Reo, ā, e kawea ana a Whakapiki i ngā akomanga mai i ngā nohinohi tae rawa atu ki te Wharekura.
 
He kaiako tau tuarua a Tasha Ropata, kei Te Wharekura o Porirua e mahi ana, ā, hei tēnei tau tutuki ai tana rēhitatanga. Ki tā Tasha, e tino whaihua ana a Whakapiki i te taumata kei reira ia e mahi ana, ka mutu he tino pai mā te kaiako hou e whakaako ana i Te Reo Rangatira o te NCEA. Kua nui ngā painga o ngā tūtohi mō ngā punga me ngā tumu, me te rauemi papa whakakōrero, i roto i āna mahi whakarite hōtaka ako, hei whakapakari anō hoki i a ia.
Ko ngā whakaahua e whai ake nei e whakaata ana i te āhua o ngā akoranga i te wharekura.

TKM Porirua

I tēnei akoranga e whakaū ana a Tasha i ngā whakaakoranga o mua mō te whakakāhore i ngā rerenga mahi me ngā rerenga hāngū. E kī ana a Tasha “nā Whakapiki i kaha ake ai taku āta tirotiro i te āhua o taku whakaako, me te arotahi mārire ki ngā hapa taha reo”.

Kei te kawea tahitia ngā mahi-ā-pukapuka me te whakaako i ngā tikanga Wete Reo o Whakapiki mō te whakakāhore i ngā rerenga hāngū. Kei te kitea he ākonga e whakamahi ana i ngā tūtohi mō ngā tumu me ngā punga.

TKM Porirua 1 TKM Porirua 2

Kua meahia e Tasha ana rauemi o Whakapiki kia noho tata mai, huri katoa i te akomanga, kia māmā ai ki ngā ākonga te nanao atu, te whāwhā.

TKM Porirua 3 TKM Porirua 4

Te Kura Māori o Whatatutu

Ko Ihipera kei te whakaako i ngā tuākana i Te Kura Māori o Whatatutu. Nō ngā Tau 5-8 ngā tamariki kei tōna akomanga. Ahakoa kua puta a Whakatutu i te Tau 1 o Whakapiki i te Reo ki Akopai, ā, kei te Tau 2 kē e haere ana, arā ētahi tākaro wetereo, hopu reo mai i te Tau 1 kua toka ki roto i ngā kawenga o te akomanga. 

Ko ‘Ngā Kapu’ tētahi o ngā tākaro nei, ā, ko te whakawaiwai kia tika te rere o te ‘a’ me te ‘o’ te kaupapa. Kei te akomanga ētahi kapu, he rerekē ngā tae.  I te tīmatanga, ko tētahi huinga kāri kōwhai anahe nō roto mai i te kēmu Papa Whakakōrero i whakamahia, engari ināianei kua maha ake ngā huinga kāri pikitia, ā, kua maha ake ngā momo mea e whakaahuatia ana hei whakarōpū mā ngā ākonga. Ina āta kōrerotia tētahi kaupapa hou i te akomanga, ka kuhuna atu ngā kari hou e hāngai ana. 

Kei waenga i te 3-5 ngā tamariki ka tākaro tahi i te kēmu nei. Ka tākaro takitahi, ā ka tū tētahi hei kaiwhakawā (māna e whakaatu ngā kāri, me te hoatu whiwhinga ina tika te whakatau nō tēhea karangatanga te mea e whakaaturia ana i te kāri).  Ka noho mai ngā kapu e rua ki te tēpu, he rerekē ngā tae. Ko tētahi ka kīia ko te kapu ‘a’, ko tētahi ko te kapu ‘o’.  Ina whakaaturia he pikitia, ka mahi nga ākonga ki te kapo i te kapu e tika ana Me whakamārama anō te ākonga he aha ia i kōwhiri ai i te kapu ‘a’, i te kapu ‘o’ rānei.    

He pārekareka te mahi nei ki ngā tamariki, nō reira kua kawea atu ki roto i ētahi atu wāhanga ako. Ā, he wā anō me nui ake i te rua ngā kapu – kei te āhua tonu o te maha o ngā kōwhiringa ka taea. Ka pai anō tēnei kēmu hei tautohu ko ēhea ngā ‘tumu’, ko ēhea ngā ‘punga’ o roto i ētahi kōrero. Ko ngā korero nei, he mea ka tautohua, ka tuhia anō hoki ki ngā kāri e ngā ākonga i roto i tētahi atu mahi i te akomanga.

Whatatutu 1 whatatutu 2

Ki runga ^

Me Huri Te Hapa Kia Tika!

Te Kura Kaupapa Māori o Te Rangiaawhia

Kātahi anō rā mātou ka pātai pēnei mō te hapa. Me pēhea rā te whakatika?

Kei te arotahi mātou, ngā kaiako o Te Rangiaawhia, ki tēnei take.  I raro i ngā mahi o Whakapiki i te Reo,  kua huri mātou ki te āta titiro ki ngā hapa e puta mai ana i roto i te reo, i waenganui i te kura.

Tuatahi, ka tuhia ngā hapa katoa e rangona ana i waenganui i a mātou, me te mōhio, kei reira anō te tini o ngā hapa, kāhore anō mātou kia mōhio he hapa!

Kei ngā mātāpono hopu reo rua o Ellis ētahi tohutohu e taea ai ngā hapa te whakatika, me ngā hapa mā te wā roa rā anō e tika ai.

Me Hura Diagram

Rautaki Whakatika Hapa:

1. Mā tētahi o ngā kaiako e rapu te whakamārama, te ture wetewete o taua kupu, kīanga rānei.
2. Ka whakawhitiwhiti kōrero mō te whakamahi o taua ture wetewete i roto i ō mātou akomanga.
3. Ka kapo mai i ngā whāinga e pā ana ki taua ture wetewete, ā, ka āta whakaako atu.
4. Me whakamātautau, me āta tirotiro anō e ngā kaiako ngā tuhinga, ngā aha atu a te ākonga, ki te kite mehemea kua kore haere taua/aua hapa.

Nā, kei runga ake nei te rautaki i whakaritea e mātou hei huarahi e taea ai  tēnei taha o te reo.

Ā ngā marama e heke mai nei, kei konei pū ā mātou mahi mō te Whakapiki i te Reo, ā, ka āta tirohia e mātou ngā hapa hanga whānui nei e puta mai ana i roto i ngā tuhinga a nga ākonga, me te whakaaro matua anō kia whakatikahia!

Ki runga ^ 

Suzy Garlick i te kura o Wikitoria, i Whakatū

He kaiako tau 1-2 a Suzy Garlick i te kura o Wikitoria, i Whakatū. Ko Suzy te Kairūruku ā-Kura mo te hotaka whakapiki hoki.

Inā tata nei, ka timata āna ākonga te whakamahi i te rauemi Papa Whakakōrero hei whakapakari i to rātou reo, he rauemi tēnei kua tohaina ki ngā kura katoa e noho ki raro i te hōtaka Whakapiki i te Reo. Ka whakamahia te rauemi
 Papa Whakakōrero nei i ngā ata, i tō rātou wā ‘Whakaputa i te Reo’ hei whakarahi ake i to rātou puna kupu me te hanga rerenga pū. 

Ko tō Suzy akomanga ko Te Whānau Koromiko, kia wha ngā wā o te wiki rātou e noho mawehe ana ki ngā teihana mahi pēnei i te ngohe Kei a wai? te pou whakarongo, te pānui ā waha, me te pūrei kāri.  

I tēnei wā tonu ko ngā akoranga e whitu o te Papa Whakakōrero te aronga matua pēnei i ngā tūmahi, ‘moe’, ‘hīkoi’, ‘oma’, ‘hōngongoi’, ‘hīteki’, ‘tū’, ‘peke’, ‘kauhoe’, ‘kaukau’ me te ‘noho’.

Tēnā, kei te ako hoki rātou i ngā tikanga e pā ana ki ngā tūpou ‘au’, ‘koe’, ‘ia’ me ngā rerenga pēnei i te 'Kei te hīkoi au', 'Kei te tū koe', 'Kei te peke ia'.  E ai ki tāna, nā ēnei tūmomo ngohe kua piki ake te puna kupu o ngā tamariki me to rātou mōhio ki te hanga i te rerenga pū ‘Kei te…..’. He rauemi whakakōrero tamariki, ā, he rauemi whakamanawa tamariki hoki.

He rauemi whakatere i te ako o te reo Māori te Papa Whakakōrero nei. Ahakoa he kemu tōna rite ka taea e ngā ākonga te korerorero pokanoa me te whakawai kore here nei, me kī, i te reo Māori i roto i tetahi horopaki āhua tūturu.

He punaha mama tō te rauemi he ngawari noa iho nei te whakawhiti atu ki te puka tautoko hei awhina i te ākonga. Nā te mahi toai, nā te mahi taruarua o te rauemi nei kāore i roa ka tere waea haere ngā ākonga me pēhea te whakawhiti kōrero te whakawhiti whakaaro hoki i roto i te reo Māori. 

Kia hoki anō ki to Suzy akomanga ki tōna wā ‘Whakaputa i te Reo’ ko te tuhituhi te mahi e whai ake ana. Ka mutu rāno ngā mahi korero ka whai wā ngā ākonga ki te tuhituhi aua rerenga hou katahi anō rātou ka ako. Heoi, i te nuinga o te wā ka tāngia he pikitia i te tuatahi, katahi ka tuhi korero mo ngā ahuatanga i roto i te pikitia.

E ai ki a Suzy ka tino rata ngā tamariki ki te hōtaka ‘Whakaputa i te reo’ nā te mea
he rerekē ngā momo mahi ka taea i roto i te wiki. He hiahia nō ngā ākonga ki te mau pai i ngā akoranga hou i mua tata atu i te timata i etahi atu akoranga hou.

papa whakakrero 1 Papa Whakakrero 2

 

 

Papa Whakakrero 3 Papa Whakakrero 4

 

 

Ki runga ^

Drummond Morice - Te Kura Kaupapa Maori o Nga Uri a Maui

Rangi 1 ǀ Rangi 2 ǀ Rangi 3 ǀ Rangi 4 ǀ Rangi 5 ǀ

He kaiako a Drummond Morice i te tau 4, i Te Kura Kaupapa Māori o Ngā Uri a Māui, i Tūranga-nui-a-Kiwa.

Kei te tau tuatahi o Whakapiki i te Reo te kura nei i tēnei wā. Ko tētahi whāinga mātāmua i roto i tēnei kaupapa, kia pakari ake te reo Māori o ngā pouako me ā rātou tamariki. Ā, kua takoto i a Matua Drummond tētahi ara e pae tata ai te pae tawhiti.

smartboard kids smartboard

Whakaahua 1: Smartboard

Whakaahua 2: Kids smartboard

He wāhi tino nui kei te ICT i roto i ngā mahi whakaako a Matua Drummond. Me kōrero te pai o te Papa Tauhikohiko o te akomanga. He kaha te whāwhāria o te mea nei hei rauemi whakaako, hei rauemi ako i tana akomanga.

Kua whakaakona atu ki ngā ākonga a Matua Drummond he aha katoa ngā momo tumu. Kawea ai ētahi ngohe maha hei tīmata i ngā mahi whakapakari reo, e rarangahia ai ēnei kete kupu (arā, ngā kete mō ngā momo tumu nei: tūāhua, tūmahi, tūwāhi, tūingoa, tūpou, tūmoko).

Ka tīpakohia he tuhinga e hāngai ana ki te kaupapa matua e tirohia ana e te akomanga kia pānuitia ngātahitia. Koia anō te tuhinga ka whakamahia hei tīmata i ngā mahi whakapakari reo i ia rā, mō ngā rangi katoa o tētahi wiki.  Kawea ai ōna anō ngohe i ia rā hei ruku i te hōhonutanga o ngā kōrero e mau mai ana ki roto, me ētahi o ngā āhuatanga reo.

Ki runga ^

Rangi 1:

Ka ārahina ngā ākonga ki te pānui i te tuhinga. Kātahi ka tonoa rātou kia kimi i ētahi o ngā kupu matua o roto, me te tuhi anō hoki i ngā kupu kei tēnā taha, kei tēnā taha o ia kupu. (He momo tumu katoa ngā kupu nei).

Rapu Kupu

Ki runga ^

Rangi 2:

Ka pānuitia anō, ā-akomanga nei, te tuhinga. Kātahi ka tautohua e ngā ākonga ngā tumu katoa ka taea e rātou te tautohu i roto i te 5 meneti.

Rapu Tumu

Ki runga ^

Rangi 3:

I muri i te pānui ā-akomanga i te tuhinga, ka tahuri ngā ākonga ki te whakarōpū i ētahi tumu kua tīpakohia mai i te tuhinga, hei tūmahi, hei tūāhua, hei tūwāhi, hei tūingoa rānei.

Te Momo Tumu 

Ki runga ^

Rangi 4:

Ka noho tōpū te akomanga ki te pānui, ki te matapaki anō i te tuhinga, kātahi ka tīpakohia e ngā ākonga tētahi o ngā kupu āwhina hei whakakī i tēnā, i tēnā o ngā āputa.

Panui Tiriwa

Ki runga ^

Rangi 5:

I muri i te pānuitanga whakamutunga o te tuhinga, ka noho ngā ākonga ki te whakaraupapa ā-pū i tētahi rārangi kupu.

Whakaraupapa Kupa a Arapu

Ki runga ^

Ko ēnei mahi nei hei ‘mahi whakamahana’ i te akomanga o Matua Drummond, kātahi ka haere ko te roanga atu o te akoranga whakapakari reo. Me te whakataetae anō a ngā ākonga kia kitea ko wai o rātou te ‘Toa Reo Māori’ i ia rangi.

Ka tahuri te kaiāwhina ki te tirotiro i ngā mahi kua tuhia e ngā ākonga ki ā rātou pukapuka, ā, ka noho tahi a Matua Drummond ki ngā ākonga ki te tirotiro i ngā whakautu ki te ngohe o taua rangi, me te whakamahi i te papa tauhikohiko. Ko tētahi o ngā ākonga hei kaitirotiro i ngā whakautu, ko tā Matua Drummond he tautoko, he hora i ngā whakatikatika ina hiahiatia.

Riro ana mā te kaitirotiro o taua rangi e whakapuaki ngā ākonga tekau kei runga ake i ētahi atu i roto i tēnei mahi (mai i te 10 ki te 1). Kia puta anō i a ia he kupu whakamihi, pēnei nā: “Kei runga noa atu koe, Tāne”, “Kāore he painga i a koe, Amiria”. Ko te ākonga ko ia kei runga rawa, ko ia te ‘Toa Reo Māori’ mō taua rangi, ā, ka whakanōhia tōna ingoa ki runga rawa o te tūtohi pakitara.

Student writing smartboard

Whakaahua 1: He ākonga e whakarōpū ana i ētahi momo tumu.

Whakaahua 2: Te ngohe e whakaaturia ana ki te papa tauhikohiko.

 

kids smartboard Papa Whakakorero

Whakaahua 3: Ētahi ākonga e whakamahi ana i te papa tauhikohiko hei whakatutuki i tētahi ngohe.

Whakaahua 4: E whakaaturia ana te Papa Whakakōrero ki te papa tauhikohiko, hei whakaako i te katoa o te akomanga.

Ki runga ^

Te Kura Māori o Porirua

He kaiako a Awaroa i tētahi akomanga Tau 1-2 i Te Kura Māori o Porirua, Te Whanganui-a-Tara. Ko ētahi o ngā kaiako o tēnei kura kei te tau tuatahi o te kaupapa Whakapiki i te Reo i Akopai. I te hōtaka wetereo o te tau tuatahi, ka āta tirohia he aha tēnei me te ‘tumu’, he aha anō te ‘punga’.  Ko ētahi whāinga tōmua o te hōtaka nei, kia pakari ake te reo o ngā ākonga, ā, kia kawea atu ngā mea e ākona ana e ngā kaiako ki roto tonu i ō rātou akomanga. E kitea ana i ngā mahi i te akomanga o Awaroa e whakaahuatia i raro nei, e tino eke ana tēnei whāinga i a ia. Nā runga i āna ake mahi ako i raro i a Whakapiki i te Reo, kua mahia e Awarua he pukapuka mō te ‘tumu’ me te ‘punga’, e tautohu ai, e whakarōpū ai ngā ākonga o tōna ake akomanga i ēnei mea (tirohia te Whakaahua 1).

tuahua_book tumu-punga-book

Whakaahua 1: He tauira o te pukapuka tūāhua.

Whakaahua 2: He ākonga e tuhi ana ki te pukapuka mō ngā tumu me ngā punga.

Ka mahi ia ākonga i tāna ake pukapuka, e arotahi ana ki tētahi o ngā kupu tumu e ono. I te Whakaahua 2, kua tuhia e te ākonga tētahi rerenga e mau mai ana ki roto te tumu, te punga rānei koia te aronga nui o taua pukapuka (hei tauira, ko te tūāhua i te Whakaahua 1), me te tuhi whakaahua anō hei hoa mō te rerenga. I te Whakaahua 3, e whakarōpū ana tētahi tokorua i ngā kupu he mea tuhi atu ki te pereti pepamārō, kia noho wehe ai ngā tumu me ngā punga. Ko tētahi atu mahi kawea ai e Awarua me ana ākonga, ko te whakarōpū i ngā kāri kua tuhia he kupu ki runga ki ngā tumu me ngā punga (kei te Whakaahua 4 tēnei).

classifying-tumu grp-work-classifying

Whakaahua 3: He ākonga e wehewehe ana i ngā tumu me ngā punga.

Whakaahua 4: He rōpū e wehewehe ana i ngā tumu me ngā punga.

Ki runga ^